ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ແຂວງວຽງຈັນ ມີຫຼາຍເມືອງມີທ່າແຮງເປັນເມືອງທ່ອງທ່ຽວ ຄື ວັງວຽງ ໃນອະນາຄົດ

ເມືອງຊະນະຄາມ, ເມືອງໝື່ນ ແລະ ເມືອງເຟືອງ ແຂວງວຽງຈັນ ມີທ່າແຮງໃນການພັດທະນາ ໃຫ້ເປັນແຫຼ່ງທ່ອງທ່ຽວທຳມະຊາດທີ່ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມເປັນຈຳນວນຫຼາຍໃນອະນາຄົດຄືກັນກັບເມືອງວັງວຽງ.

ທ່ານ ອິນທີ ເດືອນສະຫວັນ, ເຈົ້າຂອງ ບໍລິສັດ Green Discovery Laos ເຊິ່ງເປັນທຸລະກິດກ່ຽວກັບ ການທ່ອງທ່ຽວ, ໄດ້ໄປທ່ຽວຊົມສະຖານທີ່ດັ່ງກ່າວ ແລະ ເຫັນວ່າເຂດເມືອງຊະນະຄາມ, ເມືອງໝື່ນ ແລະ ເມືອງເຟືອງ ມີສະຖານທີ່ທຳມະຊາດທີ່ສວຍສົດງົດງາມຫຼາຍແຫ່ງ, ຕັ້ງຢູ່ເຂດທີ່ເໝາະສົມສຳລັບພັດທະນາ ໃຫ້ກາຍເປັນແຫຼ່ງທ່ອງທ່ຽວແຫ່ງໃໝ່ເພື່ອດຶງດູດນັກທ່ອງທ່ຽວໃຫ້ນັບມື້ນັບຫຼາຍຂຶ້ນ.

ທ່ານ ອິນທີ ກ່າວວ່າ ບັນດາສະຖານທີ່ທຳມະຊາດທີ່ສວຍງາມໃນ 3 ເມືອງນີ້ ອາດຈະກາຍເປັນແຫຼ່ງທ່ອງທ່ຽວທີ່ ດຶງດູດນັກທ່ອງທ່ຽວ ຈໍານວນຫຼວງຫຼາຍ ບໍ່ເປັນຮອງເມືອງວັງວຽງແນ່ນອນ. ຖ້າໄດ້ຮັບການເຜີຍແຜ່ໂຄສະນາເປັນ ບໍລິເວນກວ້າງ ແລະ ຖ້າໄດ້ຮັບການພັດທະນາໂດຍຜູ້ປະກອບການດ້ານການທ່ອງທ່ຽວ ໂດຍມີການປະສານງານກັບເຈົ້າໜ້າທີ່ທ້ອງຖິ່ນ.

ການປະສານງານລະຫວ່າງຜູ້ພັດທະນາ ແລະ ເຈົ້າໜ້າທີ່ທ້ອງຖິ່ນຈະສາມາດຖອດຖອນບົດຮຽນທີ່ດີໃນການພັດທະນາແຫຼ່ງທ່ອງທ່ຽວໃຫ້ມີ ມີຄຸນນະພາບ, ພ້ອມດຽວກັນນັ້ນ ເພື່ອຫຼີກລ້ຽງຂໍ້ຜິດພາດ ທີ່ເຄີຍພົບພໍ້ໃນໄລຍະຜ່ານມາ.

ການທ່ອງທ່ຽວເປັນເລື່ອງທີ່ລະອຽດອ່ອນ, ການຮູ້ທ່າແຮງຂອງການພັດທະນາແມ່ນສຳຄັນຫຼາຍ, ການກຳນົດກຸ່ມລູກຄ້າ ເພື່ອເປັນແນວທາງໃຫ້ເຮົາພັດທະນາຜະລິດຕະພັນໃຫ້ກົງກັບຕະຫຼາດກຸ່ມ ເປົ້າ ໝາຍເປັນເລື່ອງບໍ່ງ່າຍ, ແຕ່ກໍ່ບໍ່ຍາກ, ມັນຮຽກຮ້ອງໃຫ້ເຮັດວຽກກັນເປັນທີມ. ການທ່ອງທ່ຽວ ແມ່ນຂະແໜງເສດຖະກິດທີ່ກ່ຽວພັນກັບຫຼາຍພາກສ່ວນ, ສະນັ້ນການເຮັດວຽກ ໃນຮູບແບບດຽວ ກັນເປັນເລື່ອງສຳຄັນ.

ທ່ານ ອິນທີ ໄດ້ຮຽກຮ້ອງໃຫ້ຜູ້ປະກອບການຮ້ານອາຫານ ແລະ ຮ້ານບັນເທິງທີ່ດຳເນີນທຸລະກິດ ໃນສະຖານທີ່ແຫຼ່ງທ່ອງທ່ຽວທຳມະຊາດ ລວມທັງຮຽກຮ້ອງເຖິງນັກທ່ອງທ່ຽວ ຄວນປະຕິບັດຕາມລະບຽບກົດໝາຍການທ່ອງທ່ຽວເພື່ອຮັກສາແຫຼ່ງທ່ອງທ່ຽວໃຫ້ມີຄວາມຢືນຢົງ.

ປະຈຸບັນຍັງມີຮ້ານອາຫານຈຳນວນໜຶ່ງບໍ່ສາມາດປະຕິບັດຕາມກົດລະບຽບໄດ້, ເຊັນວ່າ ພວກເຂົາເປີດເພງສຽງດັງເກີນກຳນົດ, ເກີດເປັນມົນລະພິດທາງສຽງ ເຊິ່ງມັນລົບກວນການ ພັກຜ່ອນຂອງນັກທ່ອງທ່ຽວ. ນັກທ່ອງທ່ຽວສ່ວນໃຫຍ່ໄປທ່ຽວສະຖານທີ່ທຳມະຊາດແມ່ນຕ້ອງການຄວາມສະ ຫງົບ, ຄວາມເປັນທຳມະຊາດ ແລະ ສຽງເພງທີ່ເໜາະສົມ.

ຂ່າວ: ແກ້ວວຽງຄອນ ບຸນວິເສດ

ພາບ: Kizuna L. Chanthavong (Kizuna Chanthavong)