ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ຮອງລັດຖະມົນຕີ ກະຊວງ ຖວທ ເຂົ້າຮ່ວມກອງປະຊຸມວຽກງານການຕ່າງປະເທດ ໃນຂະແໜງການ ຖວທ

ໃນວັນທີ 11 ມິຖຸນາ 2020, ທີ່ຫ້ອງປະຊຸມ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ). ໄດ້ຈັດກອງປະຊຸມປຶກສາຫາລືກ່ຽວກັບການຈັດຕັ້ງປະຕິບັດວຽກງານການຕ່າງປະເທດ ໃນຂະແໜງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ໂດຍການເປັນປະທານຂອງທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ກອງປະຊຸມໄດ້ດຳເນີນໄປຢ່າງຖືກຕ້ອງກັບແນວທາງການຕ່າງປະເທດຂອງພັກ-ລັດວາງອອກ. ພ້ອມທັງ, ເປັນການເຜີຍແຜ່ເນື້ອໃນຜົນການເຂົ້າຮ່ວມກອງປະຊຸມສະຫຼຸບວຽກງານການຕ່າງປະເທດສະໄໝສາມັນ ຄັ້ງທີ V ທີ່ກະຊວງການຕ່າງປະເທດໄດ້ເປັນເຈົ້າພາບຈັດຕັ້ງກອງປະຊຸມດັ່ງກ່າວ ໃນເດືອນທັນວາ 2019 ທີ່ຜ່ານມາ. ຊຶ່ງມັນກໍ່ໄດ້ສະແດງເຖິງຄວາມເອົາໃຈໃສ່ຊີ້ນຳ ນຳພາຂອງຄະນະນຳກະຊວງຂອງພວກເຮົາ ເພື່ອຜັນຂະຫຍາຍແຜນພັດທະນາວຽກງານ ຖວທ 5 ປີ 2016-2020 ແລະ ແຜນຈຸດສຸມວຽກງານຮ່ວມມືສາກົນຂອງຂະແໜງ ຖວທ ໃນປີ 2020 ໃຫ້ມີຜົນສຳເລັດ.

ໃນປີ 2019 ທີ່ຜ່ານມາ ກໍ່ໄດ້ມີເຫດການພົ້ນເດັ່ນຫຼາຍດ້ານ ໂດຍສະເພາະ ພວກເຮົາໄດ້ຮ່ວມມືກັບປະເທດເພື່ອນມິດຍຸດທະສາດຄື ສປປ ລາວ ຈັດຕັ້ງປີທ່ອງທ່ຽວລາວ-ຈີນ 2019 ດ້ວຍຜົນສຳເລັດຢ່າງສະຫງ່າງາມ ເຕັມໄປດ້ວຍໝາກຜົນຢູ່ພາຍໃນ ແລະ ຕ່າງປະເທດ ຊຶ່ງໄດ້ສ້າງລາຍຮັບຈາກການທ່ອງທ່ຽວຫຼາຍສົມຄວນ. ໃນນັ້ນ, ພວກເຮົາໄດ້ບັນລຸ ການຕ້ອນຮັບນັກທ່ອງທ່ຽວຈີນ ມາທ່ຽວລາວ ຫຼື່ນຄາດໝາຍ 1 ລ້ານເທື່ອຄົນ.

ໃນກອງປະຊຸມດັ່ງກ່າວ ໄດ້ມີນັກວິທະຍາກອນຈາກ 3 ຂະແໜງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ລວມທັງຜູ້ຕາງໜ້າຈາກກະຊວງການຕ່າງປະເທດ ມາແລກປ່ຽນຄຳຄິດເຫັນ. ພ້ອມນີ້ ຍັງມີບັນດາຫົວໜ້າກົມຂອງກະຊວງ ຖວທ ສະເໜີແລກປ່ຽນຄວາມຄິດເຫັນ ຄື:
1) ທ່ານ ບຸນເລື່ອນ ບຸບຜາ, ຫົວໜ້າກົມຮ່ວມມືສາກົນ ຈະນຳສະເໜີວຽກງານຮ່ວມມືກັບຕ່າງປະເທດ ໃນສາມຂະແໜງການ;

2) ທ່ານ ປິ່ນປາຖະໜາ ພັນທະມາລີ, ຫົວໜ້າກົມສື່ມວນຊົນ ຊຶ່ງຈະມາແລກປ່ຽນກ່ຽວກັບການຈັດຕັ້ງປະຕິບັດວຽກງານຮ່ວມມືກັບບັນດາປະເທດເພື່ອນມິດຍຸດທະສາດ ແລະ ສາກົນທາງດ້ານການປັບປຸງສື່ໃນຍຸກໃໝ່;
3) ທ່ານ ສູນ ມະນີວົງສ໌, ຫົວໜ້າກົມໂຄສະນາການທ່ອງທ່ຽວ ຈະສະເໜີກ່ຽວກັບການປະຕິບັດວຽກງານຮ່ວມມື ແລະ ຜົນສຳເລັດດ້ານການທ່ອງ ທ່ຽວກັບອົງການຈັດຕັ້ງສາກົນ;

4) ທ່ານ ທອງໃບ ໂພທິສານ, ຫົວໜ້າກົມມໍລະດົກ ຈະນຳສະເໜີກ່ຽວກັບວຽກງານຮ່ວມມືຕ່າງປະເທດໃນຂະແໜງການບູລະນະປະຕິສັງຂອນມໍລະດົກວັດທະນະທຳ ແລະ ເຂົ້າຮ່ວມເປັນພາຄີກັບອົງການຈັດຕັ້ງສາກົນ;

5) ທ່ານ ພອນສີ ບຸນມີໄຊ, ຮອງຫົວໜ້າກົມກົງສູນ, ກະຊວງການຕ່າງປະເທດ ຈະນຳສະເໜີ ບົດຮຽນການປະສານງານວຽກງານພົວພັນຕ່າງປະເທດ ແລະ ເຜີຍແຜ່ຄຳແນະນຳ ສຳລັບການເດີນທາງເຂົ້າ-ອອກ ສປປ ລາວ ໂດຍສະເພາະການໄປເຄື່ອນໄຫວວຽກງານຕ່າງປະເທດ ໃນໄລຍະດຳເນີນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຊຶ່ງເປັນບັນຫາທີ່ ສປປ ລາວ ກໍ່ຄືທົ່ວໂລກ ພວມໄດ້ຮັບຜົນກະທົບເປັນວົງກວ້າງ.

ໃນຕອນທ້າຍຂອງກອງປະຊຸມ ຍັງໄດ້ຮັບຟັງຄຳໂອ້ລົມຈາກທ່ານຮອງລັດຖະມົນຕີ ກະຊວງ ຖວທ ຕໍ່ກັບວຽກງານ ການຕ່າງປະເທດ ໃນຂະແໜງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ການຮ່ວມມືກັບພາກພື້ນ ແລະ ສາກົນ ແມ່ນມີທັງກາລະໂອກາດ ແລະ ສິ່ງທ້າທາຍ, ສິ່ງສຳຄັນພວກເຮົາຕ້ອງກຳແໜ້ນແນວທາງນະໂຍບາຍວຽກງານຂອງພັກ-ລັດເຂົ້າໃນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແຕ່ສູນກາງ ຫາ ທ້ອງຖິ່ນ ໃຫ້ຖືກເປົ້າໝາຍ

ພ້ອມທັງຮ່ວມກັນສູ້ຊົນ ເດັດດ່ຽວ, ເພີ່ມທະວີການປະສານງານຢ່າງໄກ້ຊິດ ພ້ອມທັງເປັນເຈົ້າການ ແລະ ມີສະຕິສູງ ໃນການປະຕິບັດພັນທະຕໍ່ສາກົນ ຮູ້ຈັກໃຈ້ແຍກມິດສັດຕູ ເພື່ອຍາດແຍ່ງເອົາຜົນປະໂຫຍດມາສູ່ປະເທດຊາດ.

ພ້ອມດຽວກັນນັ້ນວຽກສຳຄັນອັນຕົ້ນຕໍ່ ແມ່ນພວກເຮົາຈະຕ້ອງໄດ້ເອົາໃຈໃສ່ບໍາລຸງກໍ່ສ້າງຖັນແຖວພະນັກງານໃຫ້ມີຄວາມຊໍານິຊໍານານ ມີລະດັບຄວາມຮູ້ພຽງພໍ ເຂົ້າໃນການປະຕິບັດວຽກງານວິຊາສະເພາະໃຫ້ມີອັນຄ່ອງແຄ້ວ ເປັນຈຸດປະສານງານທີ່ເຂັ້ມແຂງມີຄວາມສາມາດທາງດ້ານພົວພັນພາຍໃນ ກໍ່ຄືສາກົນ ຢູ່ໃນສູນກາງເຖິງທ້ອງຖິ່ນ.