ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ເມືອງໜອງບົກ ວາງຄາດໝາຍຜະລິດ ເຂົ້ານາປີ 15.700 ເຮັກຕາ

ທ່ານ ຄຳມອນ ພົມພິພັກ ຫົວໜ້າຫ້ອງການກະສິກຳ ແລະ ປ່າໄມ້ເມືອງໜອງບົກ ແຂວງຄຳມ່ວນ ລາຍງານ ໃນວັນທີ 10 ມິຖຸນາ 2020 ໃຫ້ຮຸ້ວ່າ: ສະພາບການຜະລິດເຂົ້ານາແຊງສົກປີ 2019-2020 ໃນທົ່ວເມືອງໜອງບົກ ໄດ້ວາງຄາດໝາຍຈຳນວນ 2.800 ເຮັກຕາ, ສາມາດຈັດຕັ້ງປະຕິບັດຕົວຈິງໄດ້ 3.600 ເຮັກຕາ, ລື່ນແຜນການ 800 ເຮັກຕາ. ໃນນັ້ນແມ່ນໄດ້ສຳເລັດການເກັບກ່ຽວໃນຕົ້ນເດືອພຶດສະພາ, ສະເລ່ຍສະມັດຕະພາບ 5,7 ໂຕ່ນຕໍ່ເຮັກຕາ, ລວມຜົນຜະລິດ 20 ພັນກວ່າໂຕ່ນ.

ສຳລັບການຜະລິດເຂົ້ານາປີ 2020 ປະຈຸບັນແມ່ນສຳເລັດການຕົກກ້າແລ້ວ 100% ແລະ ໄຖຮູດໄດ້ແລ້ວປະມານ 60% ໃນເນື້ອທີ່ທັງໝົດ 15.700 ເຮັກຕາ. ໃນນີ້ມີນາຫວ່ານ 5 ພັນກວ່າເຮັກຕາ ຫຼືກວມເອົາ 35% ຂອງເນື້ອທີ່ທັງໝົດ ແລະ ໄດ້ສຳເລັດການເຮັດນາຫວ່ານແລ້ວ 100%.

ສະເພາະແຜນການປູກ ພືດໃນລະດູຝົນ ມີເນື້ອທີ່ທັງໝົດ 644 ເຮັກຕາ. ປະຕິບັດໄດ້ແລ້ວ 50% ເປັນຕົ້ນແມ່ນການປູກໝາກຖົ່ວ, ໝາກແຕງ, ສາລີ, ໝາກອຶ, ໝາກເຂືອ ແລະ ພືດຜັກຕ່າງໆ ເຊິ່ງຄາດວ່າຈະປູກໃຫ້ສຳເລັດໃນທ້າຍເດືອນມິຖຸນານີ້.

ສຳລັບແຜນການຮອງຮັບໃຫ້ແກ່ການຕ້ານແລ້ງ-ຕ້ານຖ້ວມ ທາງຫ້ອງການກະສິກຳ ແລະ ປ່າໄມ້ເມືອງໄດ້ ປະສານສົມທົບກັບ 3 ກຸ່ມການຜະລິດແນວພັນເຂົ້າຂອງເມືອງເປັນຕົ້ນ: ກຸ່ມຜະລິດແນວພັນເຂົ້ານາວາງທົ່ງ, ນາວາງໃຫຍ່ ແລະ ກຸ່ມຜັກອີ່ຕູ່ ເພື່ອກະກຽມແນວພັນຈຳນວນໜຶ່ງຕອບສະໜອງໃຫ້ແກ່ຊາວກະສິກອນໃນເວລາສຸກເສີນ.

ນອກນັ້ນ ກໍ່ຍັງໄດ້ລົງຊຸກຍູ້ອຳນາດການປົກຄອງ ແລະ ພໍ່ແມ່ປະຊາຊົນໃນເຂດທີ່ມີຊົນລະປະທານ ໃຫ້ກະກຽມສ້ອມແປງ ລະບົບຊົນລະປະທານ ແລະ ບ້ານທີ່ບໍ່ມີລະບົບຊົນລະປະທານກໍ່ໃຫ້ກະກຽມຈັກເພື່ອສູບນໍ້າ ຈາກຫ້ວຍຮ່ອງຄອງບຶງ ຂຶ້ນຫົດເນື້ອທີ່ຖ້າຫາກສະພາບຝົນຕົກບໍ່ປົກກະຕິ.

#ແຂວງຄຳມ່ວນ