ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ຊ່າງແປງຈັກເຮືອດູດຫີນ-ຊາຍທີ່ຈົມລົງນໍ້າຂອງພ້ອມກັບເຮືອ ຢູ່ຫາດດອກແກ້ວຍັງບໍ່ຮູ້ຊາຕາກໍາ

ອາສາກູ້ໄພນະຄອນຫລວງ 1624 ປະຈໍາເມືອງຫາດຊາຍຟອງ ນະຄອນຫຼວງວຽງຈັນແຈ້ງໃຫ້ຮູ້ວ່າ: ຕອນບ່າຍຂອງມື້ວານນີ້ ວັນທີ 14 ມິຖຸນາ 2020, ໄດ້ເກີດເຫດເຮືອດູດຫີນ-ຊາຍຢູ່ກາງແມ່ນໍ້າຂອງເຂດບ້ານຫາດດອກແກ້ວ ເມືອງຫາດຊາຍຝອງ ນະຄອນຫລວງວຽງຈັນ ຫຼົ້ມຈົມລົງພື້ນນໍ້າຂອງພ້ອມກັບນາຍຊ່າງແປງຈັກເຮືອ 1 ຄົນ ຊຶ່ງຮອດປັດຈຸບັນນີ້ຍັງບໍ່ຮູ້ຊາຕາກໍາຂອງຊ່າງຄົນດັ່ງກ່າວ ທີ່ເປັນປະຊາຊົນເມືອງຫາດຊາຍຝອງ.

ອາສາກູ້ໄພນະຄອນຫລວງ 1624 ແຈ້ງໃຫ້ຮູ້ຕື່ມວ່າ: ປະຈຸບັນນີ້ທາງທີມງານກູ້ໄພກໍາລັງຫາວິທີເລັ່ງກູ້ເອົາຊາກເຮືອ ຂຶ້ນມາ, ແຕ່ຍັງມີຄວາມຍຸ້ງຍາກຫຼາຍຍ້ອນນໍ້າໄຫຼແຮງ,ນ້ຳຂຸ່ນ ແລະ ນ້ຳຂອງກໍຍັງຍຶ່ງຂື້ນຫຼາຍ, ຊຶ່ງຄາດວ່າຊ່າງແປງຈັກເຮືອຄົນດັ່ງກ່າວຍັງຕິດຢູ່ໃນຊາກເຮືອ. ເຮືອທີ່ຈົມລົງລວມແລ້ວມີ 2 ລໍາ, ລໍາທີ 1 ເປັນລໍາໃຫ່ຍ ຊຶ່ງຈົມລົງຢ່າງໄວວາປະມານ 3-4 ນາທີເທົ່ານັ້ນ ຍ້ອນນໍ້າໄຫຼເຂົ້າເຮືອຢ່າງແຮງເຮັດໃຫ້ນາຍຊ່າງແປງຈັກເຮືອຕັ້ງໂຕບໍ່ທັນຈຶ່ງໄດ້ຈົມລົງໄປພ້ອມກັບເຮືອ, ຕໍ່ມາເຮືອລໍາທີ 2 ກໍໄດ້ຈົມລົງແຕ່ບໍ່ມີໃຜຢູ່ໃນເຮືອ.

ຂ່າວ: ວຽງຈັນທາຍ

ພາບ: ອາສາກູໄພນະຄອນຫລວງ 1624