ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ຈີດີພີຂອງລາວ ຈະຫລຸດລົງຈົນຕິດລົບ

ເມື່ອວັນທີ 20 ມິຖຸນາ 2020, ທະນາຄານໂລກ (World Bank) ເປີດເຜີຍຜົນລວມຍອດຜະລິດຕະພັນພາຍໃນປະເທດ ຫຼື GDP ຂອງ ສປປ ລາວ ໃນປີ 2020 ຈະຫລຸດລົງ ຈົນຕິດລົບ ຢູ່ທີ່ -1.8% ຈາກທີ່ເຄີຍ ຢູ່ໃນລະດັບເຕີບໂຕ 7% ໃນຫຼາຍປີຜ່ານມາ, ເນື່ອງຈາກ ອິດທິພົນການແຜ່ລະບາດຂອງເຊື້ອ ໂຄວິດ-19 ເຮັດໃຫ້ ອຸດສາຫະກໍາ ພາກການເດີນທາງ ທ່ອງທ່ຽວ ແລະ ການໃຫ້ບໍລິການ ພາຍໃນປະເທດ ຫລຸດດິ່ງລົງ.

ສປປ ລາວ ມີປະຊາກອນ ປະມານ 7 ລ້ານຄົນ, ຜູ້ທີ່ປະກອບສ່ວນ ເຂົ້າໃນຂະແຫນງການທ່ອງທ່ຽວ ແລະ ໃຫ້ບໍລິການ ກວມເອົາ 11% ໃນເຂດຊົນນະບົດ ແລະ 22% ໃນເຂດໂຕເມືອງ, ອິດທິພົນຈາກໂຄວິດ-19 ຄາດວ່າ ຈະເຮັດໃຫ້ມີຜູ້ຕົກງານ ບໍ່ມີວຽກເຮັດ ຢູ່ລະຫວ່າງ 96,000-214,000 ຄົນ ໃນທົ່ວປະເທດ. ແຮງງານລາວ ຫຼາຍກ່ວາ 100,000 ຄົນ ທີ່ຕ້ອງໄດ້ເດີນທາງກັບປະເທດ ເນື່ອງຈາກການຖືກເລີກຈ້າງ ຍັງຈະສົງຜົນກະທົບ ການຫລຸດລົງຂອງເງິນຕາເຂົ້າປະເທດ ປະມານ 125 ລ້ານ ໂດລາສະຫະລັດ ອັນຈະສົ່ງຜົນຕໍ່ ລາຍຮັບ ໃຫ້ຫຼາຍຄົວເຮືອນ ໃນເຂດຊົນນະບົດ.

ເພື່ອຕອບໂຕ້ກັບຜົນກະທົບດັ່ງກ່າວ, ສປປ ລາວ ຕ້ອງໄດ້ກັບຄືນ ມາໃຫ້ຄວາມສໍາຄັນ ທາງດ້ານການກະສິກໍາ ເພື່ອສະໜອງອາຫານ ແລະ ສ້າງລາຍໄດ້ໃຫ້ກັບແຮງງານທ້ອງຖິ່ນ. ເຖິງແມ່ນວ່າ 70% ຂອງປະຊາກອນ ປະກອບສ່ວນໃສ່ພາກກະສິກໍາ, ແຕ່ເປັນການກະສິກໍາແບບ ລ້ຽງຊີບ ບໍ່ສາມາດຕອບສະໜອງຄວາມຕ້ອງການ ທາງການຕະຫຼາດໄດ້ພຽງພໍ. ຜົນກະທົບຈາກ ໂຄວິດ-19 ຍັງຈະສ້າງໃຫ້ ສປປ ລາວ ມີໜີ້ສິນ ເພີ່ມຂຶ້ນຢູ່ລະຫວ່າງ 65-68% ຂອງຍອດ GDP ໃນປີ 2020 ແລະຄາດການໄວ້ວ່າ ສປປ ລາວ ຈະໃຊ້ເວລາ ຕື່ມອີກ 2 ປີ ຮອດປີ 2022 ຈຶ່ງສາມາດເຮັດໃຫ້ຍອດ GDP ມາຢູ່ທີ່ລະດັບ 4.5%

 

ດ້ານທ່ານລີ​ເບີ ລີ​ບົວ​ປາວ ຮັກສາ​ການ​ຫົວໜ້າ​ສະ​ຖາ​ບັນ ​ຄົ້ນຄວ້າ​ເສດຖະກິດ​ແຫ່ງ​ຊາດ ໃຫ້ຮູ້ວ່າ: ສໍາລັບ​ການ​ຟື້ນ​ຟູ​ ເສດຖະກິດ​ໄລຍະ​ສັ້ນ ​ແມ່ນ​ຕ້ອງ​ໃຊ້​ທ່າ​ແຮງ​ໃຊ້​ກໍາ​ລັງ​ບົ່ມ​ຊ້ອນ ທີ່​ມີ​ຢູ່ພາຍ​ໃນ​ປະ​ເທດ​, ເຊິ່ງຍັງ​ສາມາດ​ເຮັດ​ໄດ້​ຢູ່ ​​ໂດຍ​ສະ​ເພາະ​ ການ​ທ່ອງ​ທ່ຽວພາຍ​ໃນ ​ແລະ ​ການ​ຜະລິດ​ກະສິກໍາ-​ຜະລິດ ​ສະບຽງອາຫານ ​ສະ​ນັ້ນ ການສົ່ງ​ເສີມ​ຜະລິດ ​ສິນຄ້າ​ຕອບ​ສະໜອງ ພາຍ​ໃນກໍ​ເປັນ​ໂອກາດດີ, ​ເຊິ່ງຜ່ານ​ມາຜູ້​ປະກອບ​ການ ຜູ້​ຜະລິດ​ພາຍ​ໃນ​ ຍັງ​ເປັນ​ຫ່ວງ​ວ່າສິນຄ້າ​ ຈາກ​ຕ່າງປະ​ເທດ​ເຂົ້າ​ມາ​ແລ້ວ ບໍ່ສາມາດ​ແຂ່ງຂັນ​ໄດ້ ຖ້າ​ວ່າ​ປະກິດ​ຈະ​ການ​ ນັ້ນໄປ​ເຮັດ​ແນວ​ອື່ນ, ​ແຕ່​ດຽວນີ້ກໍ​ເປັນ​​ໂອ​ກາດ​ດີ ຖ້າ​ບໍ່ມີ​ສິນຄ້າ​ເຂົ້າ​ມາ​ຫລາຍ ກໍ​ເປັນ​ໂອກາດ​ໃຫ້​ເຮົາ​ ຜະລິດ​ພາຍ​ໃນ ​ແລະ ​ຕອບ​ສະໜອງ ຄວາມຕ້ອງການ​ພາຍ​ໃນ. ນອກ​ນັ້ນ, ​ກໍ​ເປັນ​​ໂອກາດ​ໃນການ ​ຊຸກຍູ້​ສົ່ງ​ເສີມ​ການ​ຜະລິດ​ພາຍ​ໃນ ການ​ບໍລິການ​ພາຍ​ໃນ ທີ່​ວ່າ​ຫລຸດຜ່ອນ​ການ ​ແຂ່ງຂັນ​ກັບ​ພາຍ​ນອກ. ຜ່ານ​ມາ​ຖ້າ​ສິນຄ້າ​ຈາກ​ຕ່າງປະ​ເທດ​ເຂົ້າ​ມາ​ ກໍ​ມີ​ບັນຫາ​ກັບ​ການ​ແຂ່ງຂັນ​ພາຍ​ໃນ​ ນັກທຸ​ລະກິດທີ່ໜຸ່ມນ້ອຍ ບໍ່ສາມາດ​ແຂ່ງຂັນ​ໄດ້ ​ກັບ​ນັກ​ລົງທຶນ​ພາຍ​ນອກ​ໄດ້.

 

ປັດຈຸບັນ​, ການຫລຸດຜ່ອນ​ການ​ເຂົ້າ​ມາ​ ຂອງ​ນັກ​ລົງ​ທຶນພາຍ​ນອກ​ ກໍ​ເປັນ​ໂອກາດ​ໃຫ້​ນັກ​ລົງທຶນ​ພາຍ​ໃນ ສາມາດ​ດໍາ​ເນີນ​ທຸລະ​ກິດ ສາມາດ​ແຂ່ງ​ຂັນ​ກັນ ​ໄດ້ຢູ່​ພາຍ​ໃນ​ປະ​ເທດ ​ແຕ່ລັດຖະບານ ຕ້ອງມີນະໂຍບາຍສົ່ງເສີມ ພາກທຸລະກິດ ​ແລະ ພາກ​ທຸລະ​ກິດ​ເອງ ກໍ່ຕ້ອງເປັນເຈົ້າການ ແລະ ຖືໂອກາດພັດ ທະນາຕົນເອງ ​ໃນ​ຂະ​ນະທີ່ບໍ່ມີຄູ່ແຂ່ງຕ່າງປະເທດ ໃນໄລຍະນີ້. ພ້ອມ​ນີ້, ຍັງເປັນໂອກາດສຳລັບພາຍໃນ ພວກເຮົາ​ໃຫ້ເລີ່ມຈາກຜະລິດກຸ້ມຕົນເອງ ແລະ ຜະລິດເພື່ອຕອບສະໜອງ ຄວາມຕ້ອງການຂອງຕະ ຫລາດພາຍໃນປະເທດ.

ຂໍ້ມູນຈາກ World Bank ເດືອນ ມິຖຸນາ, 2020