ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ຫນ້າອັດສະຈັນ 23 ລ້ານວິວໃນ 3 ອາທິດ ກັບເພງ ຢາກເປັນລູກເຂີຍ

ປະກົດການ ຢາກເປັນລູກເຂີຍ ສະທ້ານສະເທືອນວົງການເພງລາວ ເພງທີ່ມີເນື້ອຫາບໍ່ຊັບຊ້ອນ ດົນຕີຮ່ວມສະໄຫມ ເອັມວີລຽບງ່າຍ ແຕ່ຄອນເຊັບມັນໂດນໃຈ ພຽງແຕ່ອັບຢູທູບໄດ້ 3 ອາທິດ ຍອດວິວທະລຸ 23 ລ້ານວິວ ຊື່ງປະຊາກອນລາວມີພຽງ 7 ລ້ານຄົນ


ເບື້ອງຫລັງເພງ ຢາກເປັນລູກເຂີຍ ເລີ່ມຈາກຢູທູບເບີລາວຄື ໂສພະນາ ຊ່າງພາບອິດສະຫຼະ ຊາວເມືອງປາກເຊ ແຂວງຈຳປາສັກ ຢາກເຮັດເພງໂປຣໂມດຊ່ອງ Sophana CHANNEL ຈື່ງປຶກສາ ແບກື ຢູທູບເບີມືຫນື່ງຂອງແດນໃຕ້ ແລະກາຍເປັນໂປຣເຈັກເພງແຈ້ງເກີດຊ່ອງທັນທີ ເພງນີ້ມີນັກຮ້ອງ 3 ຄົນຄື ໂສພະນາ, ແບກື ແລະ ນັກຮ້ອງແລັບລາວ T’Jame UNO ບ່າວເມືອງທ່າແຂກ ໂສພະນາບອກວ່າ ການລົງທືນເຮັດເພງນີ້ ໃຊ້ເງີນແຕ່ 3 ແສນກີບ ເພາະເປັນການຂໍຄວາມຮ່ວມມືຈາກຫມູ່ຄູ່

ຈຸດຂາຍຂອງເພງ ຢາກເປັນລູກເຂີຍຢູ່ທີ່ທ່ອນຮ້ອງເປັນພາສາໄທໂດຍແບກື ຊື່ງຕອນທີ່ເຮັດເອັມວີແບກື ສະແດງໄດ້ດີຫລາຍ


ຂ້ອຍ ແບກື ຂ້ອຍແບກື ນະຈະ ຖ້າສົມມຸດວ່າເຮົານັ້ນເປັນແຟນກັນ ຖ້າເປັນແບບນັ້ນ ຜົມວ່າມັນຄົງຈະດີ ເພາະອ້າຍຄົນນີ້ ຫນ້າຕາກະບໍ່ໄດ້ຫລໍ່…
ໂສພະນາ ຄິດຖືກທີີ່ໃຫ້ແບກືຮ້ອງເປັນພາສາໄທ ເພາະຄາແລັກເຕີໃນຄລິບຢູທູບຂອງແບກືຄື ຄົນລາວເວົ້າໄທ ແມ່ນວ່າຈະມີປະຕິກິລິຍາເຊິງລົບຈາກຄົນລາວບາງກຸ່ມວ່າ ລາວລືມຊາດ ບໍ່ຮ້ອງພາສາລາວ ແຕ່ໂສພະນາ ແລະ ແບກື ກໍ່ບໍ່ສົນໃຈ ເພາະດົນຕີບໍ່ມີພົມແດນ


ປະເດັນ ລາວລືມຊາດ ນັ້ນ ເທີ ຢູນາ ເຈົ້າຂອງ Una Studio ໄດ້ຊ່ວຍອະທິບາຍວ່າ ຍຸກດິຈິຕອລ ຄຳວ່າ ອັກຄະຕິທາງເຊື້ອຊາດ ຄວນຈົບກັນຈັກເທື່ອ ຄົນລາວເວົ້າອັງກິດໄດ້ ເວົ້າຫວຽດນາມໄດ້ ກໍ່ຍົກຍ່ອງຊົມເຊີຍກັນ ແຕ່ເປັນຫຍັງຄົນລາວເວົ້າໄທ ກາຍເປັນເລື່ອງບໍ່ຖືກຕ້ອງ

ແບກື ຫລືຊື່ແທ້ ສີຫາລາດ ສິດທິສານ ເຈົ້າຂອງຊ່ອງ Bigyai Seehalad ດ້ວຍຄວາມພະຍາຍາມເຮັດຄລິບຂອງຕົນ ຄລິບແລ້ວຄລິບເລົ່າ ແລ້ວມື້ຫນື່ງ ເຂົາກໍ່ປະສົບຄວາມສຳເລັດ ໄດ້ເປັນຢູທູບເບີອັນດັບຕົ້ນໆຂອງພາກໃຕ້


ສະເຫນ່ນ້ອຍໆ ແຕ່ກາຍເປັນສີສັນໃຫ່ມຄື ນາງເອກເອັມວີ ນາງນ້ອຍ ນ້ອງສາວຄົນນ້ອຍຂອງໂສພະນາລາວກຳລັງສຶກສາຊັ້ນປີ 1 ຄະນະສຶກສາມະຫາວິທະຍາໄລຈຳປາສັກ
ວົງການເພງລາວໃຫ້ການຕ້ອນຮັບເພງຢາກເປັນລູກເຂີຍເປັນຢ່າງດີ ແລະຄາດວ່າ ເພງນີ້ອາດທະລຸ 100 ລ້ານວິວ