ຂ່າວຫນ້າ 1

ຂ່າວລາວ ຂ່າວຕ່າງປະເທດ ສາລະຫນ້າຮູ້

ຈັບຜູ້ຄ້າ ພ້ອມຂອງກາງຢາໄອສ໌ 60 ກິໂລ

ວັນທີ 4 ກັນຍາ ຜ່ານມາ, ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ສະກັດກັກລົດຟໍຈູເນີ ເປົ້າໝາຍຢາເສບຕິດລາຍໃຫຍ່ ໄດ້ຢູ່ເຂດບ້ານຫາດຊາຍຄູນ ເມືອງໂຂງ ພ້ອມທັງສາມາດຈັບເປົ້າໝາຍໄດ້ 3 ຄົນ, ຢຶດຢາໄອສ໌ 60 ກິໂລກຼາມ ແລະ ຢາບ້າ 48.000 ເມັດ.

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໃຫ້ຮູ້ວ່າ: ພາຍຫຼັງທີ່ໄດ້ຮັບລາຍງານວ່າ ຈະມີການຂົ່ນສົງຢາເສບຕິດລາຍໃຫຍ່ ຜ່ານຈຸດກວດກາຫຼັກ 84 ເຂດບ້ານນາຝັ່ງ ເມືອງໂຂງ ແຂວງຈຳປາສັກ ໂດຍນຳໃຊ້ລົດຟໍຈູເນີ ສີຂາວ ໝາຍເລກທະບຽນ ວຜ 8999 ວຽງຈັນ ຈຶ່ງນຳກຳລັງເຈົ້າໜ້າທີ່ວິຊາສະເພາະ ລົງສົມທົບກັບເຈົ້າໜ້າທີ່ປະຈຳຈຸດກວດກາ. ຜ່ານການຕິດ ມາຮອດເວລາປະມານ 4:30 ໂມງ ຂອງວັນທີ 4 ກັນຍາ ກໍພົບເຫັນລົດເປົ້າໝາຍ ຂັບຂີ່ຈາກນະຄອນປາກເຊ ມຸ່ງໜ້າໄປທາງເວີນຄາມ. ພໍມາທີ່ຈຸດກວດກາ ເຈົ້າໜ້າທີ່ ກໍໄດ່ເຂົ້າສະກັດລົດ ແຕ່ເປົ້າໝາຍບໍ່ຍອມຈອດ. ຈາກນັ້ນ, ກໍໄດ້ໄລ່ຕິດຕາມລົດຄັນດັ່ງກ່າວ ໄປຫຼາຍກິໂລແມັດ ຈຶ່ງໄປທັນຢູ່ເຂດບ້ານຫາດຊາຍຄຸນ ເມືອງໂຂງ. ຜ່ານການກວດຄົ້ນ ພົບຢາເສບຕິດ ປະເພດຢາໄອສ໌ 60 ກິໂລກຼາມ ແລະ ຢາບ້າ 48.000 ເມັດ ພ້ອມກັກຕົວຜູ້ຖືກຫາ 3 ຄົນ.

ຜູ້ຖືກຫາ ຊື່ ທ້າວ ສີວອນ ອາຍຸ 36 ປີ ຢູ່ບ້ານນາຫ້ວຍ ເມືອງຊຳເໜືອ ແຂວງຫົວພັນ ພັກເຊົ່າຢູ່ບ້ານໜອງວຽງຄຳ ເມືອງໄຊທານີ ນະຄອນຫຼວງວຽງຈັນ ມີເຄື່ອງຕິດຕົວ ເງິນກີບ 700.000 ກີບ, ເງິນບາດ 36.000 ບາດ; ທ້າວ ກອງມະນີ ອາຍຸ 36 ຢູ່ບ້ານນໍ້າປຸນ ເມືອງແກ້ວອຸດົມ ແຂວງວຽງຈັນ, ເປັນເຈົ້າຂອງລົດລົດຟໍຈູເນີ ມີເຄື່ອງຕິດຕົວ ລູກປືນເສີກ 6 ລູກ, ໂທລະສັບ 3 ໜ່ວຍ, ວັດຖຸຄ້າຍຄືຄຳ ສາຍແຂນ 1 ເສັ້ນ, ແຫວນ 1 ວົງ, ພະ 5 ອົງ, ປັກແຂນ 1 ເສັ້ນ, ສາຍຄໍສີດຳພ້ອມພຣະ 1 ເສັ້ນ ແລະ ທ້າວ ໂພໄຊ ອາຍຸ 36 ປີ ຢູ່ບ້ານຫ້ວຍເພັກ ເມືອງໂພນທອງ ແຂວງຈຳປາສັກ ເຄື່ອງຕິດຕົວ ສາຍແຂນໜາກຕຸບງາຊ້າງ 1 ອັນ, ແຫວນສີເຫຼືອງຄ້າຍຄື ຄຳ 1 ວົງ ແລະ ເງິນ 7.000 ບາດ.
ປັດຈຸບັນ. ຄະດີຢາເສບຕິດດັ່ງກ່າວ ເຈົ້າໜ້າທີ່ ປກສ ແຂວງຈຳປາສັກ ພວມສືບຕໍ່ສອບສວນຂະຫຍາຍຜົນ ຫາທີ່ໄປທີ່ມາຂອງຢາເສບຕິດຈຳນວນດັ່ງກວ່າ ເພື່ອຕິດຕາມຈັບຕົວທີ່ທີ່ຖືກຊັດທອດມາດຳເນີນຄະດີຕາມກົດໝາຍ.
ຂ່າວ: ນສພ ຄວາມສະຫງົບ